انا عاوز ابقي ايه !!! , هنساعدك تعرف الطريق الانسب ليك

 كانت اتكلمت الفنانه راندا معانا هنا في المدونه , علي جزء مهم جداً وهو ازاي تعرف انت عاوز ايه ... المقال ده هنتكلم فيه عن الحته دي. 

احنا مش هنتكلم عن كافه مجالات الحياه , احنا هنا بنتكلم علي جزء معين وهو

" انا عاوز ابقي مصمم بس هبقي مصمم ايه !!!!! "

طيب اول حاجه كدا هنعمل زي ما راندا قالت بالظبط:

 التجربه : 
هنجرب كل حاجه ونشوف احنا دماغنا في ايه , ابدا اشتغل في كل حاجه خاصه بالتصاميم من اول الكتابه علي الحيط (بس متبوظش الدنيا هاااا) لحد ما تشتغل تصاميم ديجيتال مروراً بالورق والاسكتشات وهكذا .

طيب احنا خضنا التجربه وانا محسيتش اني منجذب ناحية حاجه بعينها , او منجذب لكذا حاجه .... هيبقي لازم نعمل خطوه جديده وهي ايه ؟! 

 التجربه : 
= تاني !!! انت بتهزر ياعم .
- لا والله مش بهزر بس انت التجربه الاولي معملتش معاك اي نتيجه يبقي لازم تجرب تاني .
= طيب هجرب ايه المره دي ؟
- المره دي هتحدد الحاجات اللي لفتت نظرك اكتر وتشتغل فيها شويه . 
= طيب حددت ولقيت ان في 3 حاجات عاجبيني جداً ونفسي اشتغل فيهم . 
- طيب ما تشتغلهم ... 
= نعم !!! اشتغل 3 حاجات مع بعض .
- اه ايه المشكله ف كدا ؟؟

= طيب ودي هعملها ازاي بقي ؟
- بكل بساطه هتعمل ورقه وتكتب فيها ال 3 حاجات دول بترتيب بدماغك انت يعني ( الاسهل للاصعب او العكس وهكذا ) وبعد ما تخلص الترتيب هتبدأ في وحده وحده ومتدخلش في وحده الا لما تخلص اللي قبلها .

= تمام هعمل كدا واشوف .

- حلو كدا احنا خلصنا 60% من المشكله 

= متهزرش 60% ايه بس احنا لسه عملنا حاجه ؟!
- ايوه طبعا انت عملت حاجه عظيمه جداً جداًاًاًاً , ومش سهل انها تتحقق متستهونش بيها .
= طيب ايه الخطوه اللي بعد كدا .

- مفكرتش فيها بصراحه بس لو احنا خلصنا التجارب يبقي الخطوه اللي جايه اكيد هتكون :

الخطه : 
= خطه ايه ياعم انت رايح تسرق بنك .
- اولاً البنك بقي اليكتروني ولا انت لسه عايش ف ايام زمان , ثانياً لازم تبقي انسان منظم انت مش بتشتغل انت فنان والخطه دي لابد منها علشان تعرف انت هتعمل ايه بالظبط بنقاط محدده متبقاش تايه .
= طيب قولي ايه الخطه ياعم من غير فلسفه . 
- هو انا كمان اللي هحطلك الخطه !!!

= امال انا بقرأ المقاله دي ليه من الاول ها ؟!
- الخطة لو حد تاني اللي حطهالك بنسبه كبيره هتفشل لكذا سبب :
         1- محدش عارف ظروفك بالظبط ايه .
         2- محدش بيهتم بحد لدرجه انه يعرف ادق تفاصيله . 
         3- الخطه لو ثابته مش هتمشي مع الكل .

بس انا هعمل معاك واجب حلو اوي ...... بص ياسيدي صلي علي النبي كدا 
= اللهم صلي وسلم وبارك علي سيدنا محمد وعلي آله وصحبه وسلم 
- اساسيات الخطه هتمشي بشكل بسيط جداً ... اول الخطه انت عملته لما حددت انت عاوز ايه , تاني حاجه تحدد مصادر تعلمك ايه هي بمعني ( في ناس بتحب شرح الفيديوهات يبقي هتستخدم اليوتيوب او يودمي مثلا , في ناس بتحب الكتب يبقي هتدور علي كتب خاصه بالمجال اللي اختارته , وفي ناس بتحب المحاضرات المباشره ودي هتحتاج مركز تدريب معتمد ومحترم ) طيب تالت حاجه لازم تمارس كتير بعد طبعا ما تطبق مع الدروس بتاعتك وتاخد مده محترمه وكبيره علشان تتعلم الاساسيات , بعدها هتحتاج تتعلم المهارات ودي مش بتبقي بدروس دي بتبقي مكتسبه مع الممارسه , طيب الخطوه الاهم ايه هي التكرار لازم تكرر وتعدل وتمسح وتقطع ورق وتبوظ علشان تلاقي حاجه فخمه في الاخر وبعدها شوف نفسك فين من السوق .

دي اساسيات اي خطه لكن في حاجات بتبقي متغيره طبعا من شخص لشخص .... المهم لازم تخلي بالك من شويه حاجات :

- مصادر التعلم :

تختار الاقوي اللي عليه اجماع اراء

تختار اللي عليه تقيم اعلي

ديما متفكرش في الجديد قبل ما تتعلم القديم 

جرب برضو كل كورس قبل ما تبدأ فيه وحاول تختار اكتر واحد مريحك 
اقرأ كتير كتير كتير 

- وقتك :

وقتك هتتسال عليه يوم القيامه 
حدد لنفسك وقت معين وحدد جزء معين تخلصه في الوقت ده 
خليها عاده عندك من ضمن يومك انك زي ما بتصلي بتاكل بتشرب يكون ليك وقت للدراسه دي 
غير ميعاد دراستك لو حسيت انك مش مركز فيه 

- مكانك : 

في الجزء ده هيكون مهم انك تركز علي 3 حاجات ( الهدوء - النظافة - التنظيم )
لازم تختار مكان منعزل عن الدوشه والزحمه , لازم تحدد مساحتك الشخصيه للدراسه .

- التعامل مع المكان :

يعني ايه التعامل مع المكان !!
ببساطه الدراسه والشغل مش مجرد مكتب منظم وورق مرتب والكلام ده ... لا 
حضرتك لازم تحدد قعدتك المفضله , ومتحددش مكان واحد للدراسه يوم يبقي ف المكتب ويوم يبقي في السطوح ومش لازم المكتب يكون حاجه فخمه لا ممكن يكون كومدينو او كارتونه كبيره وعليها خشبه عريضه وبس . 
المكتب ده هيطلع منه شخصيه عظيمه زي حضرتك . 

محدش يركز مع الراجل ده ... ده دماغه عاليه حبتين 😂😂

- التعامل مع الدراسه :

حضرتك لازم تعرف ان الدراسه لفترات طويله افشل حاجه ممكن تتعرضلها ف حياتك لكذا سبب نفسي وجسدي تقدر تسال جوجل ف الموضوع ده . 
بس انا هساعدك شويه ومتدورش ورايا برا :
 1- اذكر ربنا قبل ما تبدأ واحمده بعد ما تخلص.
 2- قدره الدماغ للاستيعاب بتختلف من شخص لاخر ف منصحكش بانك تقعد ع الدراسه كتير خليها ساعتين .
 3- خد بريك ربع ساعه بين كل ساعتين وبعض .
 4- اشرب سوايل كتير وخصوصاً مياه . ( ع 3 مرات مش مره وحده زي ما وصانا الرسول )
 5- بعد ما تخلص دراسه للجزء اللي محدده طبق عليه كتير علشان ميضيعش .
 6- متهتمش انك تخلص كم كبير ع قد ما تهتم انك تخلص صح .
 7- اقعد قعده مستقيمه ضهرك مفرود رجلك مرتاحه .

طيب في اخر المقاله دي حابب بس اوضح جزء صغير .. كل اللي فوق ده مش هيتحقق لو معندكش عزيمه واصرار ولو فضلت تاخر نفسك هتلاقي نفسك مش بتنجز اي حاجه .

ابدأ دلوقتي ..... ربنا معاك ♥